Tuesday, 23 September 2008

كل سنه و انتو طيبين

كل سنة و أنتوا طيبين, سنة دراسية جديدة ابتدت كلها امال و طموحات.
امال و طموحات فى مستقبل سعيد و حياة ناجحة أو حتى وجود ذكريات حلوة نفتكرها لما تخلص السنة.
بس علشان ناخد حقنا فى الحياة الواسعة لازم ناخد حقوقنا فى الحياة الجامعية .

حقنا فى تعليم مجانى بجد , يعنى ندفع المصاريف القانونية اللى هى 12 جنيه للانتظام و 14 جنيه للانتساب مش الاتاوات اللى بندفعها و اللى بتوصل ل300 و 400 جنيه و مش عارفين بيروحوا فين.

حقنا فى مدرجات تسعنا كلنا مش تساع بس ربع الدفعة و الربع الباقى يبقى قاعد على الشبابيك و الباقى مالوش مكان أصلاُ.

حقنا فى كتب مدعمة نقدر نشتريها مش كتب لو جمعنا تمنها نقدر نجيب عربية .

حقنا فى معامل تقدر تخلينا نطبق اللى بناخده مش معامل طرشى.

حقنا فى ان احنا ناخد قرارتنا المصيرية بنفسنا مش نصحى نلاقيهم باعوا الجامعة وودونا اخر الدنيا.

حقنا فى ملاعب نقدر نلعب فيها مش خرابات بتتحول لمزبلة.

كل دة احنا شايفينوا ممكن يتحقق لو حطينا ايدينا فى ايدين بعض.
مين احنا؟؟ احنا مجموعة من الطلبة سمينا نفسنا حركة حقى عشان احنا بنطالب بحقوقنا , لو شايف ان الطلبة مش اخدين حقوقهم فى الجامعة انضم لينا , و كل ما نزيد واحد حنقرب لحقوقنا أكتر.
و كل سنة و احنا طلبة اخدين حقوقنا.

حركة حقى

Share this Link !