رسالة من نهلة ..... اداب انجليزى سابقا

بداية الكلام كده .... مفيش تعليم !

واللي عايز يتعلم يبقى يدخل خاص

جامعة اسكندرية ( خاصة المجمع ) اتشال من الخريطة عندي

اداميتي اتلغت في المجمع لاني كنت مش انسانة انما مجرد ملطشة للناس تتفرج عليها ابتداء من الدكاترة للطلبة لحد اللي واقفين عل الباب بتوع الكارنيهات دول

نبتدي من بره اسوار الكلية لجوة

سور الكلية

السور ... راجل غريب جدا واقف على اول رصيف كلية أداب , مكنتش عارفة مين داه؟ افتكرتو راجل بيركب كل يوم من هنا و بالمرة بيبص بص عالى البنات و يعاكس عقبال مايركب ... اتارية بيراقب اللي داخل واللي طالع عشان يشوف حيلطش منو ايه !

طبعا انا كنت ضحية الراجل داه من وسط الزحمة اللي داخلة باب اداب و قدام الظابط مد ايدو فشنطتي وخد موبيلي من غير أي مشاكل

العيال البلطجيه

جوة الكلية زحمة جدا واشكال و الوان , وللاسف كلها شريحة صعب لاي شريحة من شارائح المجتمع انها تندمج معاها , ومؤخرا سمعت من البنت اللي بتيجي تنضف عندنا لما كنت بحكلها على المجمع .. ردت وقالت : "اه دول بيئة وبلطجيه .. دول اصلا مش طلبة , ده بيكون مصاحبلو واحده في المجمع وبتيجي يقضي اليوم معاها "

ياعني انا مجبرة اني اختلط مع شله عيال معاهم مطاوي و مشارط عشان داخلين يحبوا فواحده ؟؟؟؟؟ بس الغلط في مييين ؟؟؟ فاللي قاعدين على باب الكليه اللي بيدخلو أي حد مدام بياخدو البطايق رهن ... بلاش .. سمعت من واحد .. انو كانو بيدوه ساندوتشات عشان يدخلهم .. "لا تعليق "

مره حصلت خناقة مع الشباب الامور داه , ومطاوي و دم وولاد كانو بيقعو .. و سمعت ان فيه ولد راسو طارت " و مش بعيد انو ممكن يكون بجد " جرينا للامن و الضابط اللي كل شغلنتو , انو يزعق و يشتم .. رد بكل شجاعة و قال : " وانا مالي ادخل اضرب ولا اتعور " لا الراجل عندو حق , سلامتو بالدنيا ...

الطلبة المحترمين

طبعا القاعده الاولى في مصر .. ان البنت لازم تتعاكس بدايه من المنقبه , اللي لابسه خمار , لابسه حجاب , مش لابسه حجاب و لابسه لبس حشم , اللي ماشيه على حل شعرها و اللي لابسه كارينا ..... الخ

و في المجمع الطلبة الولاد كانو بيحبو يعبرو عن رأيهم و اقتراحتهم .. مرة وانا طالعه رايحه محضرتي.. جيه واحد كان بيقترح عليا ان المفروض جسمي يبقى عامل ازاي !! ؟ قال بوقاحه " اه لو ***** شوية !

ومرة واحد قلي افتحي اول كام زرار في الجاكت , عشان الجاكت كان حشم !

كليتي جميلة نظيفة متطورة منتجة

طبعا مش حتكلم عن اد ايه الكليه جديدة والواحد مش خايف تقع على دماغو .. انا كنت في كلية اداب انجليزي طبعا كله بيقلي " ديه رحمة يا بنتي امال كليه كزا تبقى ايه ؟؟؟ " المهم هي في الدور الرابع و السلالم متعبه , وفوق كل داه انا عندي حلات بتجيلي شبه الربو قوي .. فا بيتعمل الاسانسير ..اللي واقف في الاسانسير .. يوم حبيبك و يوم عدوك .. طول مالجنيه فايدي حبيبي , وطول ماايدي فاضية يزعق و يقول :لأ داه للدكاترة بس ! ممنوع الطلبة !!! او لما يكون معاه دكتور طالع ... احب الفت الانتباه لفته عابرة لحمامات البنات عمتا اللي تضج بالبنات المدخنات و المحششات .. المهم عندنا في القسم 4 غرف تقريبا لدفعه تعمل 200 طالب , وكلمة مدرج ملغيه من القاموس, و طبعا من اسم الكليه اداب انجليزي .. اكيد طبعا فيه كتابة و قرايه و كلام كتير قوي .. و الكراسي عبارة عن كراسي اللقهوة , غير مريجة بالمرة , مفيش حته نكتب عليها , داه حتى الطلبه كانو بيقعدو على الارض و ياخدو الكراسي طربيزات .............. كنت بحلم في الصيف بمروحه ... مش تكيف حتى .. انما غرف الدكاترة الواحد يلبس جاكت من البرد في عز الصيف ! مرة بابا بيحكيلي عن ابن صاحبو .. ايام ما كان في تجارة و حول لكليه خاصة ... الولد كان صامد و صابر على الوضع اللي فيه لحد ماشاف المدرج كان زحمة واللي قاعدين على الشباك , واللي قاعدين على الارض متكدسين .. ولما دخل الدكتور من كتر الزحمة ابتدى يهشهم برجليه ! الولد في اللحظه ديه .. عرف انو بيظلم نفسو و اداميتو ...

دكاترتي الأعزاء

في السريع .. فيه دكتور ممسوك علية ( على ايامي و الله اعلم وصلو لكام ) 3 قضايا تحرش , و هو كل مايجي يدخل المحضرة .. يقول : الولاد يقعدو ورا .. و البنات قدام .. و يافلانة و فلانة و انتي و انتي اقعديلي اول صف , و انا كنت من بينهم و مكنتش فاهمة ليه .. المهم المحاضرة اللي بعديها .. قعدت ورا ام جابني من بعيد و قالي ... مش قلتلك تقعدي اقدام؟؟؟ اتارية طلع بينقي البنات الحلوين يقعدولو قدام عشان يبصبص براحتو .. واللي اكدلي الكلام .. اني لما كنت بعمل امتحان شفوي .. كنا بندخل خمسة 5 , و حظي كان مع بنتين محجبتين وواحده بخمار وواحده بنقاب و انا اللي من غير حجاب .. عديت الامتحان من غير ما افتح بقي .. داه انا اكتر واحده تهتهت و اتلجلجت وهو اللي كان بيكمل كلامي .. اللي يضحك انو يوم امتحان الشفوي داه ... القسم كله بيبقى متشيك و متمجيك و على سنجة 10 و فعلا مبطلتش ضحك يوميها ... فية بنت دخلت في الكلام معانا .. و قالتلي انت اكيد حتعدي الامتحان .. قلتلها ليه ؟ ردت قالت : DR ****** loves beautiful girls !وعشان انا محجبة ومتجوزة عمري ماعديت الشفهي معاه خالص ...

وطبعا اللي عايز يعدي السنة صافي يدخل عنجو المكتب و يقفل الباب وراه ...................................

وفيه دكتورة بتعمل الامتحانات على حسب ظروفها ! مرة مدرس الكورس بيقلنا خلي بالكو ظروف الدكتورة فلانه مش كويسه السنادي .. توقعو انها مش حتحطلكم امتحان كويس .. والدكتورة ديه بتنقي طلبه معينين .. و بتدلهم نمرت تيليفوناتها .. عشان تقلهم ليله الامتحان , الامتحان حيجي من ايه ! دول طبعا الطلبة المحببين على قلبها !!

يدا بيد ... الكليه و الكورسات

مفيش حاجه اسمها كليه من غير كورسات .. الدكاترة على وشك انهم يقوللنا .. لما تبقو تروحو الكورسات ابقو خليه يشرحلكم الحته ديه ... انا الصبح في الكلية .. بعد الضهر كورسات .. كل المواد !!!!!! الدكاترة مش بيشرحو .. مش عشان ملهمش نفس ... انما عشان عارفين اننا بناخد كورسات فيوفروا حبت العقل و الصحه اللي حيلتهم ... الكورس اللي هو السنتر عبارة عن .. غرفة كبيرة .. كلها كراسي كتير بتاخد بتاع 50 شخص .. والمدرس واقف عالى السبورة وبيشرح .. المنظر داه بيفكرني بحاجه .. ايه هي ياترى ؟؟؟؟ اه ! الكليه

ياعني نافص الكورس يطلعلنا شهاده و نبطل نروح الكليه !

شؤن المزلولين

أي اوراق أي حاجات ... روح جري عند مدام فلانه في شؤن الطلبة .. الواحد لما يسمع شؤن الطلبه الجسم بيقشعر ,,, لسه حقف في الطابور الطوييييييييييييييييييييييل داه اللي مش بيتحرك .. في الزحمة ديه ؟؟؟؟ مع الناس ديه ؟ احنا بنتزل عشان نقف .. ونتزل عشان ناخد دور .. ونتزل عشان نمشي في الطابور .. غير الخناقه مع الناس عشان بتاخد دورك .. والزق و قلت الزوق و الخنقة و الحر ... و و و و ... واول ما الواحد يوصل يا اما بيكون كل اللي عملو داه ناقص ولازم اجيب ورق كزا و طابع كزا بنص جنية ( و داه طبعا عشان مفيش ورق ولا يفط تشرح الخطوات و الاجراءات والورق اللي مفروض يتعمل قبل مانحط رجلينا في النار .. قصدي شئون الطلبة ) يا اما السيناريو التاني ان اللي واقفة على الشباك تتعصب من الزحمة و تتخنق وتقوم قافلة الشباك فوشنا زي مانكون حيوانات و تحت رحمتها , وقت مايجيلها نفس تفتح تفتح , وطبعا الاعمال ديه اعمال كتابية مش على اختراع اول مرة نسمع عنه وهو الكومبيوتر .. اللي ممكن تعمل اوراق 10 طلاب في نفس الفترة اللي ممكن تعمل اوراق طالب واحد كتابيا !

ورانا ايه ؟؟

السنه في قسمنا بسنتين ! لما طلعت نتيجة القسم اخر السنه ... كان حوالي 75% من الدفعة صاقطة .. و 25% ناجحين ( اللي هما كانو مدبلرين ) قعدت اعيط وانهارت لانو ديه مش انا , اللي كنت بجيب مجموع عالي في المدرسه ... و من المتفوقين والطلبه المجتهدين في المدرسه .. دانا جبت مجموع يدخلني أي كليه في مصر تقبل ادبي ! ايه اللي حصلي ؟؟؟؟ اكيد داه كابوس !!! اكيد فيه حاجه غلط !!

طبعا فيه حاجة غلط ! الغلط انو .. الدفعه كبيرة فالدكاترة بيحاولو يقليلو العدد عن طريق انهم يطفشو الطلبه , و النظام كما يلي .... المواد كلها زي العقد , لو ماده راحت .. المواد كلها تحصلها .. يعني لو وقعت في ماده القراءة .. اكيد حتجر الكتابة .. حتى لو كنت جايب في الكتابة امتياز .. طب وهو انت حتعدي بمدتين ؟؟؟؟ لا شيل التالتة !

واكتشفت بعد ماعديت الترم الاول صافي .. اشيل الترم التاني 6 مواد !!

نهاية سعيدة من بداية تعيسة

في الاخر .... بابا قلي حدخلك كليه خاصة .. و من غير تفكير ... حولت .. لما بابا راح يسحبلي الورق .. رجع زعقلي و قلي انت ازاي راضيتي على نفسك بكده!!؟؟؟؟